Өлсөж байсан ч иргэд "тэнэг" биш

A.Admin, monday.mn
2015 оны 12 сарын 18
Сонгууль дөхөөд хүмүүсийн зан авир, хүн чанар ил гарч ичих булчирхайгүй болох юм. Ингэж хэлж байгаагийн учир Их хурал, аймгийн ИТХ-д сонгогдохын тулд иргэдийн ходоодоор нь тоглож, ядуу зүдүү, ажил төрөлгүй дээр нь дөрөөлж хэрхэн шоудах вэ гэж ухаанаа уралдуулж жирийн үед сэтгэхгүй санаа гаргаж эхэлнэ. Энэ удаагийн УИХ-ын сонгуульд Эрдэнэтийн гаралтай эрхэмүүдээс илүүтэй Улаанбаатарын явуулын эрхэмүүд нэр дэвшихээ зарлаж байгаа хүмүүсийн нэг нь Н.Энхтайван юм.
 
Төрийн бус байгууллагынхаа ажлаар 2013 оноос эхлэн Эрдэнэтээр мэр сэр үзэгдэж яваандаа МАН-ын гишүүн, би Эрдэнэтийн хүүхэд та бүхэндээ хайртай, дуртай гэж өөрийгөө рекламдаж эхэлсэн. Үүний нэг жишээ: Номын үзэсгэлэн юм. Үүнээс гадна Эрдэнэтэд ирэх үедээ үе үе иргэдийг цуглуулж хооллоно.Ингээд бодохоор эдийн засгийн хүнд хэцүү, гэр хорооллын дэлгүүрүүд талхыг хувааж зүсмээр нь зарахад хүрч байгаа учраас иргэдийг ходоодоор нь худалдаж авч болно гэж ойлгож яваа бололтой. Харин энэ удаад хооллох тоглолтоо хойш тавьж эд материал руу оруулж эхэллээ. УИХ-ын гишүүнээр сонгогдохыг горилж яваа  Н.Энхтайван Эрдэнэтийн 18 нас хүрсэн иргэн бүрт ил захидал илгээж түүнийгээ 30 гаруй мянган хувиар хэвлүүлэн тарааж байна.

Захидлаас хүргэвэл "Эрдэнэтчүүд бид энэ сайхан хотоо улам бүр хөгжүүлж аз жаргалтай, ажилтай орлоготой, сэтгэл хангалуун амьдрах хүсэл мөрөөдлөөр дүүрэн байдаг. Сүүлийн үеийн эдийн засгийн хямрал Эрдэнэтчүүд бидний ажил амьдралд хүндхэн тусаж байна. Тиймээс Эрдэнэт хотоо улам хөгжүүлж өөрсдийн ажил амьдралаа сайжруулж, үр хүүхдүүдээ ирээдүйд сайн сайхан амьдруулахын тулд хамгийн түрүүнд ямар асуудлыг шийдвэл зүйтэй талаар өөрийн үнэтэй санал бодлоо бичиж ирүүлнэ үү” гэжээ. Захидалын хариу болгож захидал бичсэн иргэдийг сугалаанд оролцуулж LCD телевизор, хөргөгч, гар утас, индүү гэх мэт цахилгаан барааг хожих боломж олгон, азтан болгоно гэж байгаа. Гэхдээ энэ үйл ажиллагаа цаанаа нэг учир бий гэх хүн цөөнгүй байна. Хэдэн хүн захидалд хариу өгөх бол гэж хүлээж суухаас гадна хэдэн хүн сонгуулиар намайг дэмжиж саналаа өгөх бол гэдгийг тандаж байгаа бололтой. Хамгийн гол нь регистрийн дугаар, гэрийн хаягийг нь бүртгэж авч байгаа нь ямар учиртай вэ? Сонгуулиар л улс төрийн нам, нэр дэвшигчид иргэдийн регистрийн дугаар, гэрийн хаягийг нь олж авч мэдээллийн бааз үүсгэх гэж тэмцэлддэг. Энэ эрхэм ч бас мэдээллийн бааз үүсгэж сонгуулиар ашиглах гэж байгааг үгүйсгэхгүй. Үүнээс гадна Н.Энхтайван сонгуульд ялчихвуу гэлтэй үйл явдал өчигдөр болжээ.

Энэ сарын 17-ны өдөр Завхан аймгийн нутгийн зөвлөлийн шинэ жилийн баярын цэнгүүн болж олон азтан тодорсоны нэг нь Н.Энхтайван. Тэрээр 100 доллар хожжээ. Тэнд цугласан МАН-ын зарим гишүүд Энхтайван ийм азтай байгаа юм чинь УИХ-ын сонгуульд ялах нь гарцаагүй, Их хурлын гишүүний сэнтийд заларч биднийгээ ивээлдээ авах нь ойлгомжтой баяр хүргэе гэж ам уралдан магтсан сурагтай. Гэхдээ Орхон аймгийн МАН-ын намын үүрийн дарга нар нь Н.Энхтайван бол амиа бодож хувиа хичээдэг хооллох ундлах гээд зохион байгуулж байгаа ажилдаа биднийг оролцуулдаггүй гэж гомдоллож хорхой идсэн араандаа зууж байгаа гэсэн шүү. Н.Энхтайван болон бусад нэр дэвшигчидэд хандаж хэлэхэд “иргэд ходоодоо тийм амархан худалдчих тэнэг хүмүүс биш шүү” гэдгийг жирийн сонгогч хүний хувиас хэлмээр байна. 

ТОП ярилцлага

Сүүлд шинэчлэгдсэн


Copyrights © 2010-2021, БҮХ ЭРХ ХУУЛИАР ХАМГААЛАГДСАН.
Gazelle системийг ашиглан бүтээв